La revuo Esperanto denove superis la limon de 5000 abonantoj, plifortigante tiel sian pozicion kiel la plej disvastigita Esperanto-periodaĵo. En 1997 Esperanto iris al 5003 ricevantoj en 115 landoj, kiuj kotizis en unu el la "revuaj" membrokategorioj de UEA aŭ kiuj abonis la revuon aparte. En 1996 tiu nombro estis 4932.
Kontakto, la soci-kultura revuo de TEJO, siavice faris novan rekordon
de la nombro de pagitaj ricevantoj. Post 2009 abonoj en 1996 la nombro kreskis
al 2050 en 1997. Per la jarkolekto 1997 Francisco L. Veuthey finis 6-jaran
sukcesan redaktorecon, dum kiu Kontakto fariĝis enhave vigla
kaj grafike modela inter la Esperanto-gazetoj.