Margaret Zaleski-Zamenhof, la pranepino de "la Majstro", kaj Katalin Kovats, redaktoro de https://edukado.net/, kun ekzemploj rakontas pri tio, kiel Margaret lernis Esperanton kun Katalin. Vi povas ekscii la du flankojn de tiu kunlaboro: el vidpunkto de lernanto kaj de instruisto kaj eble ekhavi ideon pri tio, kiel riĉigi vian lern- aŭ instru-agadon. La prelego vidigos al vi, ke por bone lerni nian “facilan lingvon” oni tamen devas diligente labori. #virtualakongreso Tiu prelego okazis en la Virtuala Kongreso de Esperanto (1-8 aŭgusto 2020), la 4-an de aŭgusto 2020, je la 14:45 UTC, kiel parto de la Tago de Lernado, kompilita de ILEI por la Virtuala Kongreso de Esperanto (VK). La VK okazis kadre de la Monda Festivalo de Esperanto (MondaFest' 2020) organizata de UEA kun teknika prizorgo de E@I. Subteni la laboron de UEA eblas per membriĝo: https://uea.org/alighoj/alighilo #mondafest2020

#virtualakongreso La Virtuala Movada Foiro (ViMF) estis speciala okazaĵo de la Virtuala Kongreso de Esperanto (1-8 aŭgusto 2020), dum kiu dekoj da esperantistaj organizoj kaj iniciatoj sin prezentis al la publiko dum la 8 kongresaj tagoj. Inaŭguris la Virtualan Movadan Foiron la budo de Edukado.net kaj Ekparolu, prezentitaj de Katalin Kovats. Ĝi fariĝis la dua plej spektata ero de la programo de la kongreso. Tiu prezento okazis la 1-an de aŭgusto 2020, je la 10:00 UTC. La Virtuala Kongreso de Esperanto (VK) okazis kadre de la Monda Festivalo de Esperanto (MondaFest' 2020) organizata de UEA kun teknika prizorgo de E@I. Subteni la laboron de UEA eblas per membriĝo: https://uea.org/alighoj/alighilo #mondafest2020

Renkontiĝo kun la ĉefredaktoro okaze de du gravegaj mejloŝtonoj en la historio de la internacia, sendependa magazino. Rendevuo kadre de la serio "Klerige", sub la kunordigo de la komisiito de UEA pri Kulturo, Claude Nourmont. En la jaro 2020 la Esperanto-mondo celebras du datrevenojn. La revuo Monato festas sian 40-jariĝon, kaj Stefan Maul, la fondinto de Monato, ĉi-monate festos sian 80an naskiĝdatrevenon. Tiujn 40 jarojn, ekde la kreo de la revuo ĝis nun, Paŭl Peeraerts de tre proksime spertis, komence kiel ĝia kvazaŭa sekretario ĝis nun kiel ĉefredaktoro. Nepre ne maltrafu la okazon renkontiĝi kun Paŭl kaj starigi al li demandojn. #Esperanto #UEA

Printempa Inaŭguro estas Ia ferma tago de la Monda Festivalo de Esperanto 2020 - MondaFest'. MondaFest' 2020 omaĝis du festajn sezonojn: Someron kaj Printempon. La Somera Inaŭguro markis la unuan oficialan tagon de la festivalo kaj omaĝis la komenciĝon de somero en la norda hemisfero. La Printempa Inaŭguro markas la lastan oficialan tagon de la Festivalo kaj omaĝas la komenciĝon de printempo en la suda hemisfero. Tial MondaFest' 2020 kun espero rigardas nian planedon, per inspiriĝo je sezonoj de varmo kaj florado, kaj per du inaŭguroj tenos dinamika kaj konstanta la agadon por Esperanto kaj por la kulturo de paco kaj diverseco en nia mondo.

"En Esperantujo oni ofte parolas pri junuloj, sed ni ne forgesu la maljunulojn, kiuj konstruis la movadon kaj komunumon, kiujn ni ĝuas hodiaŭ", skribis antaŭ kelkaj jaroj nia karmemora Mateo Chisolm, el Toronto, pri Eduardo Vivancos (foje esperantigita Vivankos). Eduardo estis honorita pro elstara agado dum la ferma ceremonio de la UK en Seulo 2017. Naskiĝinta en Barcelono la 19-an de septembro 1920, Eduardo Vivancos estas esperantisto ekde la 1930-aj jaroj. Li partoprenis la Hispanan militon (1936-39) kaj eĉ instruis Esperanton al siaj kamaradoj en la fronto. Ĝis antaŭnelonge Eduardo havis mirinde firman memoron kaj senlimajn rakontojn pri la milito kaj la posta ekziliĝo en la koncentrejoj en Francio, antaŭ lia translokiĝo al Toronto en 1954, kie li motoris la lokan movadon dum jardekoj. Venu lerni pri lia eksterordinara vivo kajkunfesti lian centjariĝon kun Javier Alcalde, kiu verkas lian biografion.

Tiu ĉi rendevuo kadre de la serio "Klerige", sub la kunordigo de Claude Nourmont, komisiito de UEA pri Kulturo, fokusiĝos pri la urĝe solvenda nuntempa migradkrizo en Grekio, priraportota el ĵurnalista vidpunkto. Daŭre miloj da rifuĝintoj restas senhejmaj sur la greka insulo Lesbos, ĉar pasintan semajnon forbrulis la rifuĝintejo „Moria“ sur tiu insulo. Ĝi estis la plej granda rifuĝintejo en Europo. Ĉirkaŭ 13.000 homoj, ĉefe el Afganio, vivis en tiu rifuĝintejo – en tre malbonaj kondiĉoj. Nun tiuj homoj vivas surstrate, ĝis provizora, nova rifuĝintejo estos finkonstruita sur la insulo Lesbos. La fifama rifuĝintejo Moria estis parto de la Eŭropa sistemo por kontroli enmigradon: ĉiuj rifuĝintoj, kiuj venis per etaj boatoj de la turka marbordo al la proksime situanta greka insulo Lesbos, estis senditaj en tiun rifuĝejon. Ili ne rajtas forlasi la insulon, ĝis estas decidite, ĉu ili ricevas azilon en Eŭropo aŭ ne. Moria havis lokon por 2.800 personoj. Komence de tiu ĉi jaro pli ol 20.000 homoj devis vivi en la rifuĝintejo, t.e. sep foje ĝia kapacito. En la pasintaj monatoj multaj rifuĝintoj povis forlasi la rifuĝintejon Moria, sed daŭre 13.000 personoj vivis tie dum la incendio. Neniu mortis pro la fajro, estis kelkaj vunditoj. Pro la vivkondiĉoj en Moria Eŭropa Unio devas honti. Nun la registaroj de la EU-Ŝtatoj diskutas kiel nov-organizi la rifuĝintejon sur la insulo Lesbos kaj la membroŝtatoj de Eŭropa Unio disputas kiel dividi la rifuĝintojn. Grekio plendas, ke apenaŭ iu alia EU-Ŝtato pretas transpreni rifuĝintojn de Grekio. La rifuĝintoj alvenas en Eŭropon unue al Grekio, ĉar ĝi situas ĉe la limo de Eŭropa Unio. Eŭropa Unio krome diskutas, kiel trakti la problemon de internacia migrado. Rapida solvo estas malverŝajna. Tial provizore miloj da rifuĝintoj devos resti sur la Grekaj insuloj. Post la prezento, Thomas respondos al demandoj de la spektantaro. Thomas Bormann, ĵurnalisto kaj korespondanto pri Grekio por la Germana Radio-reto ARD, loĝas en la greka ĉefurbo Ateno. Pasintan semajnon li estis sur la insulo Lesbos por raporti en radio kaj televido pri la incendio en Moria kaj pri la sekvoj por la rifuĝintoj. #Esperanto #UEA

Dua rendevuo kadre de la serio "Klerige", sub la kunordigo de Claude Nourmont, komisiito de UEA pri Kulturo. Ekde 2015 Heidi Goes vizitis ses fojojn Angolon por siaj doktorigaj esploroj. Ŝia esplortereno estis precipe Kabindo, eksklava provinco de Angolo inter Kongo Kinŝaso kaj Kongo Brazavilo. En 2018 ŝi sukcesis post prelego pri alia temo, paroleti pri Esperanto al mezlernejanoj kaj en 2019 ŝi enkondukis Esperanton en la sama mezlernejo kaj en apuda lernejo por ontaj instruistoj (en Landana). Ŝi ankaŭ dancigis plurajn grupojn de infanoj je Esperanto-muziko, en Landana kaj Necuto. En la ĉefurbo Luanda ŝi renkontis kelkajn esperantistojn kaj ŝi parolis interalie al la nova belga ambasadoro en Angolo pri Esperanto. Kune kun Abel Massiala el Kabindo ŝi transdonis Brulo kaj Ritmo, la tradukitan poemaron de la unua prezidento de Angolo, Agostinho Neto al la Memormuzeo António Agostinho Neto. Post la prezento, Heidi respondos al la demandoj de la publiko.

Renkontiĝo kun kelkaj el niaj plej famaj aŭtoroj, por kleriĝi kaj inspiriĝi. Kadre de la serio "Klerige", sub la kunordigo de la komisiito de UEA pri Kulturo Claude Nourmont, okazos la unua sesio de Literatura Forumo. Se vi deziras koni de pli proksime kelkajn el niaj plej famaj verkistoj, pliprofundiĝi en nian literaturon kaj kulturon, inspiriĝi kaj inspiri aliajn, kaj pri legado kaj pri verkado, nepre ne maltrafu tiun ĉi eventon! Partoprenos en la unua sesio: Anna Löwenstein Mikaelo Bronŝtejn Spomenka Ŝtimec Jorge Camacho Organizis kaj gvidos la sesion Oĉjo Ĉajka, lanĉinto kaj gvidinto de pluraj literaturaj eroj dum la ĉijara kongresa sezono.

Pri "Kristnaskaj rakontoj el franca kanado", de Louis Fréchette, prelegis François "Francisko" Lorrain, la tradukisto, en la Tago de Ameriko: https://www.youtube.com/watch?v=IAeaTnP1tFM Belega eldono, la libro elĉerpiĝis en la libroservo de UEA, sed plu eblas ĝin akiri ĉe http://www.esperanto.qc.ca/eo/eldonajhoj/ La libro havas 130 paĝojn, kun nigraj-blankaj ilustraĵoj de la kanada pentristo Frederick Simpson Coburn (1871–1960). Eblas ĝin akiri papere aŭ elektronike! Jen en ĝi ses kristnaskaj rakontoj de Louis Fréchette [lui freŝet] (1839–1908), unu el la gravaj franckanadaj verkistoj de la 19a jarcento. Li aperigis ilin en 1899–1900, en versioj anglalingva kaj franclingva, ambaŭ de li mem verkitaj, kun la celo konigi la franckanadan kulturon al la ekstera mondo. Li studis juron, sed poste aktivis ĉefe kiel ĵurnalisto kaj verkisto. Li estis, laŭ la tiamaj normoj, sufiĉe progresema homo. Krom siaj multnombraj gazetartikoloj, li multe publikigis, en diversaj ĝenroj : ĉefe poezion, sed ankaŭ teatraĵojn, rakontojn k.a. Specimene el la libro: [En neĝoŝtormo] […] Ni reeniris la neĝveturilon, kaj, dum ni varme volvis nin en la « robojn » [t.e. en peltajn kovrilojn], la veturigisto vigle vipis siajn ĉevalojn, kiuj ĵetis sin antaŭen, nazbruante, tra la ventopelata neĝo. La gastejestro ja pravis ; post malpli ol horo, ni blinde antaŭeniris sur nevetureblaj vojoj, en plena mallumo, envolvataj en tia neĝhajla torento, kian neniu vidinta neniam la samon povas imagi. Ni supreniris perpendiklajn krutaĵojn, sur kies suproj niaj ĉevaloj apenaŭ povis stari kontraŭ la vento, kaj poste ni devis malsupreniri en faŭkantajn abismojn, flankatajn de gigantaj abioj, kie la kompatindaj bestoj preskaŭ malaperis en la kirliĝanta neĝo. Kompreneble, ni ne povis iri pli rapide ol paŝon post paŝo ; kaj, gvidate per nura instinkto, niaj ĉevaloj, lacegaj kaj blindigataj de algluiĝintaj hajleroj, pene plu stumblis kun pendaj kapoj, spiregante. « Ĉu ni revenu malantaŭen ? » mi demandis al la veturigisto. « Evidentas, ke ni apenaŭ povas plu antaŭeniri. » « Malantaŭeniri ! » ekkriis la kompatinda homo, kiu ŝajnis amare bedaŭri sian antaŭnelongan fanfaronadon ; « estas tro malfrue, sinjoro ; mi estas tiel blinda, kiel miaj ĉevaloj ; se reveni malantaŭen, ni riskus maltrafi la vojon, kaj, kun la vojo maltrafita, mi ne donus kvin cendojn por niaj tri haŭtoj. » La kuracisto nenion diris. Nia situacio fariĝis senespera ; ni povis nek malantaŭeniri, nek restadi en la sama loko, ĉar la vetero terure malplivarmiĝis, kaj, spite niajn dikajn peltojn, ni estis frostigitaj ĝis la ostoj. Ni povis nur antaŭeniri — ĉiuriske antaŭeniri. […] (El Kristnaskaj rakontoj el franca Kanado de Louis Fréchette, 2-a eldono, Montrealo, Esperanto-Societo Kebekia, 2013). #Esperanto #UEA

Luis Obando kaj Jahir Cataño (Kolombio) gajnis la 1-an lokon en la 8-a Eŭropa Festivalo de Esperantaj Kantoj, kiu okazis en 2020 kadre de la Monda Festivalo de Esperanto (MondaFest' 2020), per la kanto "Indiĝena Romanco" en la kategorio aĝo 19-54 koruso/ensemblo. La prezento de la premiitoj de la 8-a Eŭropa Festivalo de Esperantaj Kantoj okazis ĉi-sabate, la 12-an de septembro, je la 14:00 UTC ĉe http://ecem.com.pl/. La eventon organizas la Eŭropa Centro de Interkultura Edukado, sub gvido de Małgorzata "Małgosia" J. Komarnicka, aŭspiciate de Universala Esperanto-Asocio, ILEI, Eurokka kaj aliaj grupoj. La kanto "Indiĝena Romanco" estis verkita de la kolombia maestro Luis Antonio Diago Montilla. La tradukon en Esperanton faris Luis Obando. Kantis kvinvoĉe Luis Obando kaj Jahir Cataño. La kanto ankaŭ estis parto de la programo de la Tago de Ameriko: https://www.youtube.com/watch?v=IAeaTnP1tFM UEA varme gratulas al Luis, Jahir kaj la organizantoj de la Eŭropa Festivalo! - Subteni la laboron de UEA eblas per aliĝo: https://uea.org/alighoj/alighilo #Esperanto #UEA #Muziko

La Tago de Ameriko estis la lasta el la regionaj tagoj de la Monda Festivalo de Esperanto (MondaFest' 2020). Diana Alondra, el Meksiko, lerninto de Esperanto per la E-kurso por hispanparolantoj okazinta kadre de Mondafest' 2020, prezentas sian prelegon pri la bela figuro de la malpleno en la pentrado de Luis Vargas Santa Cruz. Luis Vargas Santa Cruz estas la pentristo de la malpura milito; relata al sociaj aferoj, lia politika arto kontribuis al la batalo por la vero kaj la historia memoro en krimoj kontraŭ la homaro en Meksiko, kun serioj kiel "Aicus Arreug" pri la malpura milito en Guerrero kaj "Aznad Etreum" pri perfortaj malaperoj . Kun sia nova verko, "La elĵeto de la paradizo", li dividas kun la spektanto sian introspekton dum enfermado, per sentempaj konceptoj, influoj de la pasinteco kaj serĉado de la reinvento de la homa korpo per memoro. Uzante la paletron Apelles kaj la personan koloran paletron, li starigas dialogon inter klasika arto kaj mitologia arto por doni voĉon al la emocioj kaj malfortikecoj de la homaro, en ilia rilato kun Eros kaj Thanatos. La tutan programon de la Tago de Ameriko vi povas re-spekti ĉi tie: https://youtu.be/IAeaTnP1tFM. ------------------------------------------------------------- Subtenu la laboron de UEA per membriĝo: https://uea.org/alighoj/alighilo #Esperanto #Ameriko #UEA

Kulmina momento de la plej klasika manifestiĝo de la Esperanta kulturo! La gvida BK-skipo rigardas la ceremonion de disdono de la BK-premioj kiel eron de spektaklo konceptata por kunĝuado de la E-kulturo. Tial ĝi parolas pri BK-Festo. Ĉi-jare la BK-Festo, samkiel preskaŭ ĉiuj E-aranĝoj, nepre okazas virtuale. Tial oni devis adapti ĝin al tiu prezent-maniero. Sed BK disponas, krom kompetenta uzanto de teknikaj rimedoj, la BK-Sekretario mem, teamon de valoraj kunlaborantoj: muzikistoj, kantistoj, deklamantoj ktp, kiuj certe igos nin ĝoje kunfesti la mirindaĵon de la E-kulturo en ties diversaj manifestiĝoj kaj konatiĝi kun la nomoj de la konkursaĵoj kaj konkursantoj premiitaj en BK-2020. Kunspektu kaj kunfestu tiun ĉi specialan momenton per la ĉefaj komunikkanaloj de UEA! :-)

Riccardo Lamperti konversacios kun Przemysław Wierzbowski, prezidanto de Bjalistoka Esperanto-Societo, pri la dulingva eldono de “Baladina” - ĉeesta, publika prezento pria okazos tuj antaŭ la intervjuo (https://eventaservo.org/e/nacialegado2020) - , pri la Nacia Legado en Esperanto kaj pri aliaj kulturaj iniciatoj en la naskiĝurbo de L. L. Zamenhof. Legu pli ĉe: https://eventaservo.org/e/0fe8bf

La Tago de Ameriko estis la lasta el la regionaj tagoj de la Monda Festivalo de Esperanto (MondaFest' 2020). Humphrey Tonkin estis invitita saluti la partoprenantojn de la evento kiel Honora Prezidanto de UEA. Bonvenon spekti lian salutadon, kiu multe reprezentas la spiriton de la momento por ni, esperantistoj. La tutan programon de la Tago de Ameriko vi povas re-spekti ĉi tie: https://youtu.be/IAeaTnP1tFM. La teksto de la salutado troveblas ĉe: https://revuoesperanto.org/tonkin_ameriko. ------------------------------------------------------------- Subtenu la laboron de UEA per membriĝo: https://uea.org/alighoj/alighilo #Esperanto #Ameriko #UEA