Pardonpeton!

La vera aspekto de la retejo ne povas por esti korekte rigardata per via retumilo.
La adreso:
Universala Esperanto-Asocio
Nieuwe Binnenweg 176, 3015 BJ Rotterdam, Nederlando
tel.: +31 10 436 1044
faks.: +49 30 364280169
rete: vidu la liston
 
tekoregularoj → perantoj
Regularo pri perantoj

Decidita 2013-08-05

1. Amplekso de la regularo

Tiu ĉi regularo fiksas la elektoprocedon de perantoj, kondiĉojn por perantoj kaj funkciojn de perantoj.

2. Elektoprocedo de perantoj

2.1 Peranton nomumas la Estraro de UEA surbaze de propono de la Ĝenerala Direktoro, aŭ de Direktoro de la Centra Oficejo, se tiu ekzistas (en plua teksto: la Direktoro).

2.2 La Direktoro konsultiĝas pri proponota kandidato kun landa asocio, se ĝi ekzistas en la koncerna lando.

2.3 En urĝaj kazoj la Direktoro povas provizore nomumi peranton. Tiun nomumon la Direktoro devas tuj prezenti al la Estraro por aprobo.

2.4 Povas esti pli ol unu peranto por unu regno.

3. Kondiĉoj por peranto

3.1 Peranto povas esti landa asocio, alia enlanda movada instanco, aŭ individua persono.

3.2 Kandidato por peranteco, kiu estas individua persono, devas plenumi la kondiĉojn por esti delegito laŭ § 5(1) de la Regularo pri delegitoj.

3.3 Ĉefdelegito povas esti samtempe peranto. Se ĉefdelegito funkcias ankaŭ kiel peranto, al lia peranteco estas aplikataj reguloj kiuj validas por peranto.

3.4 Por limigitaj celoj, ekzemple perado de abonoj kune kun libroservo, kroma neoficiala peranto povas esti akceptita je aliaj kondiĉoj kaj kun limigitaj funkcioj.

4. Funkcioj de peranto

4.1 La peranto varbas novajn membrojn por UEA.

4.2 La peranto akceptas nome de UEA:

  • membrokotizojn
  • aliĝojn por Universala Kongreso
  • mendojn por Universala Kongreso
  • abonojn je revuoj eldonataj de UEA aŭ TEJO, unuavice Revuo Esperanto kaj Kontakto
  • donacojn al UEA kaj ĝiaj fondaĵoj.

4.3 La peranto akurate informas al UEA pri ricevitaj kotizoj, aliĝoj, mendoj, abonoj kaj donacoj, laŭ instrukcioj pri urĝo kaj tempolimoj, kiujn donas la Direktoro.

4.4 La peranto transpagas al UEA laŭ instrukcio de la Direktoro.

5. Kompenso

Peranto retenas procentaĵon de la perataj membro-kotizoj, kongres-aliĝoj kaj abon-kotizoj, por kovri la kostojn de sia perado. La procentaĵon difinas la Estraro de UEA. La peranto ne rajtas aldoni administrajn aŭ aliajn krompagojn al la kotizoj oficiale anoncitaj de UEA.

6. Valido de la funkcio, kaj ĉeso de la funkcio

6.1 La oficperiodo de peranto ne estas limigita, se UEA kaj peranto ne interkonsentas pri io alia.

6.2 La funkcio de peranto ĉesas pro unu el la jenaj kaŭzoj:

  • se pri tio interkonsentas UEA kaj la peranto;
  • per anonco pri rezigno de UEA aŭ de la peranto, kiu ne devas esti motivita, sed peranto kiu volas rezigni pri sia peranteco avertu la Asocion kiel eble plej frue, por ke ĝi povu ĝustatempe fari novajn aranĝojn;
  • se ĉesas ekzisti la kondiĉoj por elekti iun peranton;
  • se peranto malobservas siajn devojn, speciale se peranto misuzas fidon aŭ havaĵon de UEA.

6.3 Peranto, kiu ĉesas funkcii kiel tia, devas finfari la informojn kaj transpagojn laŭ § 4.3 kaj § 4.4.

(Laste reviziita 2013-07-26)

tekoregularoj → perantoj
Supren
UEA, 2021