Francujo: la 7-a Esperanto-staĝo en Métabief

El UEA-vikio
Revizio de 20:50, 3 Nov. 2021 fare de Piet-c (Diskuto | kontribuoj)

(malsamoj) ← Antaŭa versio | Rigardi nunan version (malsamoj) | Sekva versio → (malsamoj)
Iri al: navigado, serĉi
  -  Landa Raporto
Nia Mondo

2-a de septembro 2021

Situo de Francujo ruĝa.ph.png

La staĝo, organizita, same kiel la lastan jaron, de la klubo “Esperanto Chalonnais” sub la gvidado de Anne-Marie Ferrier, okazis meze de aŭgusto 2021 (15.08 – 21.08.2021) en la vilaĝo Métabief. Ĉar la koronvirusa pandemio daŭris kun pli rigoraj kondiĉoj, la partoprenantoj devis havi sanatestilon por havi permeson partopreni la aranĝon. Kunvenis 25 geesperantistoj, plejparte francoj el diversaj regionoj kaj unu geedza paro el Svislando.

Bona ideo estis, ke ĉiu alportu ion el sia regiono. Do, dum la kafopaŭzoj ni povis ĝui diversajn frandaĵojn kaj aperitive ni gustumis plurajn sortimentojn de vinoj kaj fromaĝoj. Bongustis ankaŭ prunoj el nia ĝardeno.
Ĉiutage ni bone kaj ĝissate manĝis.


Kiel kutime, matene kaj antaŭ la vespermanĝoj okazis Esperanto-kursoj. Michel Dechy instruis ĉefe pere de bild-rakontoj, bildoj kaj gazet-artikoloj. La lernantoj ŝatis roli en la aventuroj de Tinĉjo en Tibeto, la preferata albumo de Hergé mem. Li ankaŭ prezentis Esperanton en VTF (Vilaĝo, Turismo, Familio) antaŭ dudeko da gejunuloj kaj gepatroj. Ankaŭ pluraj esperantistoj ĉeestis la prelegon. La unuan vesperon li prezentis la verkon de Hergé, serion de 24 albumoj de la Aventuroj de Tinĉjo kaj Miluĉjo.


Métabief - 2021.jpg

Jacqueline Poux instruis aparte al du virinoj, kiuj jam havis bazajn sciojn pri la lingvo, sed kiuj deziris perfektiĝi pri Esperanto.


La konversacian Esperanto-kurson gvidis Catherine Kremer. Ŝi mem priskribis la manieron prezenti sian kurson: Mi zorgis pri la kurso B. Mia rolo estis paroligi la partoprenantojn. En mia grupo ok interesatoj ĉeestis. Paroligi homojn ne ĉiam estas facile. La unuan tagon ni prezentis nin: kiu mi estas, de kie mi venas, kion mi ŝatas fari (hobiojn), kio estas mia profesio... Tre rapide la homoj interparolis. Mi tutsimple petis, ke ili prezentu al ni temon, kiun ili plej ŝatas. Kiu parolis pri kio: Max donis al ni pikardan recepton. Mi notis ĉion kaj provos fari ĝin hejme! Paŭlo prezentis al ni la metodon por krei ĉampanon. Belege! Ĉefe, ke li alportis ĉion (t.e. ĉampanon kaj rozkolorajn biskvitojn el “Reims”) por ke ĉiuj profitu bonegan aperitivon!


Thérèse parolis al ni pri sia infaneco rolante kiel “fratino Paŭlino”. Christian rakontis al ni kiamaniere li transformis simplan urban ĝardenon en fruktodonan legomĝardenon. Ni nomis la diversajn ilojn, la legomojn ktp.
Tre kortuŝa priskribo de “Constantine” en Alĝerio faris Jeanine helpate de Josiane. Ili vojaĝigis nin en aparta etoso. Unu rakontis, la alia desegnis la mapon de “La Roko” kun la pontoj ktp. Isabelle klarigis al ni, kial “Paray-Le-Morial” estas vojo al paradizo. Ŝi parolis al ni pri “Notre-Dame de Romay”. Jean-Paul rakontis pri sia unua renkonto kun Esperanto. Bernard intervenis por paroli pri la projekto “Common Voice”.


Floreal kaj Liba alvenis iom pli poste. Liba kiel kutime fotis kaj Floreal fariĝis nia kontrolisto pri la bona uzo de kelkaj vortoj – ni ne plu bezonis vortaron! Mi vere dankas al la tuta grupo! Mi denove multe lernis dank’ al ĉiuj kaj en agrabla etoso.

Post la tagmanĝo okazis piedmigradoj en la montaro Jura, vizitoj de la kastelo La Château de Joux, de mueleja muzeo, de distilejo en Pontarlier kun gustumado, de ekspozicio pri fabrikado de fromaĝoj kaj veturado per turisma trajno.


Vespere ni ludis tabloludojn kaj dancis. Dieter Rooke rememorigis la 100-jariĝon de SAT (Sennacieca Asocio Tutmonda) kaj Martine Demouy prezentis bildojn kaj rakontis pri vizito al la regiono de Fukuŝima kaj montris la domon de esperantistoj Jacugatake.

Ĉiuj estis kontentaj kaj tre feliĉaj povinte denove renkontiĝi kaj ĝui agrablan semajnon en tiu montara loko de ĵurasa regiono. Dankon al la organizantoj!


Fonto: (eo) Liba Gabalda La 7-a Esperanto-staĝo en Métabief 15.08 – 21.08.2021, Kolombo de Paco (n-ro 20, p3) (2021-08-27)