Ekzamenoj

El UEA-vikio
Iri al: navigado, serĉi
 Japana ekslibriso.ph.png

Navigado tra Kapabligo

Aliloken :

Ĉi tiu temo prezentas bazajn informojn pri la du ĉefaj internaciaj ekzamenaj sistemoj, en kiuj rolas UEA, kaj klarigas la esencajn diferencojn inter ili. Ĝi prezentas ligilojn, per kiuj akiri pli da informoj pri ambaŭ sistemoj.


Ekzamenoj ege gravas por nia parolkomunumo; ili permesas al parolantoj atesti sian kapablon uzi la lingvon kaj aspiri al pli altnivelaj komunikaj kapabloj. Tio tre gravas por parolkomunumo, kiu ne vivas en difinita teritorio kaj sekve ne havas kontinuajn eblojn praktiki la lingvon.

Por internaciaj ekzamenoj pri kaj en Esperanto ekzistas esence du vaste alireblaj ofertoj :

La KER-ekzamenoj

Tiuj konformas al la normoj de la Komuna Eŭropa Referenckadro (KER) lanĉita de Konsilio de Eŭropo. Ilin organizas kune UEA kaj la hungara oficialiga ŝtata instanco ITK en Budapeŝto, Hungario. ITK signifas Idegennyelvi Továbbképző Központ (Laŭvorte: Fremdlingva Plueduka Centro; Oficale: Supera Fremdlingva Trejnejo). La momente ofertataj niveloj estas B1, B2 kaj C1, laŭ la trilitera skalo aplikata al ĉiu ofertata lingvo. Tiuj ekzamenoj estis starigitaj en 2009, post kio milkvincento da kandidatoj ricevis diplomojn. Tiu kadro fakte ne plu estas nur eŭropa, ĉar en ĝi aperas la araba, la ĉina, la japana, la korea lingvo kaj Esperanto. Kvankam starigita de la Konsilio de Eŭropo, ili altiras kandidatojn el ĉiuj kontinentoj.

La ekzamenoj de UEA-ILEI

Tiuj baziĝas sur propre kreitaj normoj. La nuna oferto estis fondita en 1989; en iliaj unuaj kvin jaroj da funkciado, 500 personoj trapasis ilin. Ilin administras sep-persona teamo (Internacia Ekzamena Komisiono) kies membrojn elektas la komitatoj de UEA kaj ILEI kune. Entute ĉ. milo da homoj sukcesis. La ekzamenoj ĝis nun estis du-nivelaj, ili estas nuntempe en stato de transformo al trinivela sistemo.

Estu klare, ke ILEI forte subtenas kaj rekomendas ambaŭ ofertojn, kvankam ĝi formale ne partoprenas en la organiza strukturo de la KER-ekzamenoj. Ambaŭ sistemoj metas la emfazon sur komunika kapablo: parola, aŭskulta, skriba kaj lega – la ekzamenoj ĉe ambaŭ estas praktike plene Esperant-lingvaj.


Komparo de la du sistemo j

Por ke la du sistemoj utile kunekzistu, ni vicigas la esencajn diferencojn inter ili :

  1. La KER-ekzamenoj havas ŝtatan agnoskon ene de multlingva kadro, dum la ekzamenoj de UEA/ILEI havas nur enmovadan statuson.
  2. La ekzamenoj de UEA/ILEI povas ĉefe utili ekster Eŭropo, kie la praktika utilo de la eŭropinstanca oficialigo malpli gravas. Plimulto de la sesioj tra la lastaj jaroj ja okazis ekstereŭrope.
  3. La ekzamenoj de UEA/ILEI trairas transformon, cele al kreo de enir-nivela oferto (ekvivalenta al A1/A2 laŭ la skalo de KER), unuavice por uzo en landoj, kie mankas nacia ekzamena sistemo. Tiu celas doni fruan mezurilon pri kapablo kaj rapidan sukcessenton al novuloj.
  4. La ekzamenoj de UEA/ILEI ĉiam enhavis testadon de kulturaj kaj movadaj konoj – pri la literaturo, movadaj historio kaj strukturo kaj pri la ĉefaj trajtoj de la parol-komunumo. Estonte, tiu parto estos ampleksigita, precipe ĉe la evoluigata tria nivelo. Kontraste, la ekzamenoj de KER testas pure kaj nure lingvouzan kapablon.


Por plenaj informoj pri la KER-ekzamenoj, kaj listigon de baldaŭaj ekzamensesioj, bv. viziti edukado.net.
Pri la ekzamenoj UEA/ILEI bonvolu viziti ilei.info.