Japanujo: Nova cirkonstanco, malnova amuleto

El UEA-vikio
Iri al: navigado, serĉi
Nia Mondo

1-a de novembro 2020

Amabieo.ph.jpg

Nuntempe evidentiĝas, ke la kronvirusa pandemio profunde kaj definitive ŝanĝis la mondon. Oni avide volas kaj serĉas novaĵojn kaj informojn pri la nova malsano, rilatajn al kuracadoj, al manieroj por protekti sin kaj al la situacio en aliaj landoj.

Vaste serĉataj estas ankaŭ novaj kaj malnovaj dokumentoj, kronikoj, rakontoj kaj romanoj pri epidemioj kaj pandemioj okazintaj. Ekzemple, en Japanio la romanoj „Pesto” (La Peste) de Albert Camus (1947, Francio) kaj „Eseo pri blindeco” (Ensaio sobre a cegueira) de José Saramago (1995, Portugalio) estas bone konataj kaj denove legataj.

Amabieo kaj Amabiko

En marto subite kaptis la atenton de la popolo malnova ilustraĵo pri imaga marvirineto, „Amabieo”, kiu espereble protektas homojn kontraŭ epidemioj. Ĝi aperis en ilustrita ĵurnalo eldonita en 1846 kaj konservata en la arkivo de la Universitato de Kioto. Laŭ la ĵurnalo Amabie aperis ĉe la insulo Kiuŝuo, en la maro apud Kumamoto, kaj ŝi promesis al la vilaĝanoj bonan rikolton. Desegnaĵoj kun ŝia figuro protektis ilin kontraŭ epidemioj.

Aliloke oni rakontis pri viro nomata Amabiko, kiu same protektas la homojn.

Simbolo kontraŭ la pandemio

Tiuj rakontoj estis preskaŭ tute forgesitaj de la popolo kun escepto de kelkaj folkloristoj. Post la publikiĝo de la ilustraĵo, Amabieo fariĝis simbolo de batalo kaj protekto kontraŭ kovimo. Tuj aperis artaĵoj pri Amabieo: amuletoj, pupoj, dolĉaĵoj, ceramikaĵoj ktp. Ankaŭ la Ministrejo pri Sano, Laboro kaj Bonfarto uzis ŝin en kampanjo kontraŭ kovimo.


Klarigo: Kovimo = Kovim-19 = Covid-19, malsano kaŭzata de la nova kronviruso.


Fonto: (eo) ISIKAWA Takasi, korespondanto de MONATO en Japanio, Nova cirkonstanco, malnova amuleto Monato (2020-07-12)